domenica 4 ottobre 2009

SICILIA SI PIGGHIO' LI FIGGHI I MATRI

 
Sicilia si pigghiò li figghi 'i matri

Sicilia assai chiancìu pi' lu focu
ca ggenti tinta e 'nfami appicciò 'n locu

e lacrimi pisanti nni spargìu
quannu arrubbàru o' ciumi 'u ben di Diu.

Ficiru ponti 'nta la sciara sicca
cu' tanta rina e ferru picca picca.

Iccàru lu vilenu 'nta lu mari:
supra 'i balati trigghi e calamari.

Fora ri testa pi' lu gran duluri,
Sicilia s'arraggiò, fici rumuri;

'a terra e l'acqua, senza cugnizioni,
vosiru fari rapprisintazioni:

isàru 'a tila nivura i tiatri...
e Idda si pigghiò li figghi 'i matri.

 


Versi di Peppino C./zio-silen

Nessun commento: